सिन्धुली,१६ असोज — परीक्षणका रूपमा सुरु गरिएको अकबरे खुर्सानी खेतीले पहिलो वर्षमै अपेक्षाभन्दा राम्रो उत्पादन दिएपछि सिन्धुलीको फिक्कल गाउँपालिका–६ गोगनपानी नमुना टोलका किसान उत्साहित भएका छन् । एक वर्षअघि थोरै क्षेत्रफलमा लगाइएको खुर्सानी अहिले बजार पठाउने तयारीमा छ । खेतबारीमा राता र हरिया अकबरे लटरम्म फलेसँगै किसान उत्पादन टिप्ने र बिक्रीका लागि आवश्यक व्यवस्था मिलाउने काममा जुटेका छन् ।

परम्परागत खाद्यान्न बालीबाट उचित प्रतिफल पाउन नसकेका स्थानीय किसानलाई व्यावसायिक कृषितर्फ आकर्षित गर्ने उद्देश्यले गत वर्ष नमुना कार्यक्रम सुरु गरिएको थियो । परीक्षणमार्फत स्थानीय अवस्थामा अकबरे खेतीको सम्भावना पहिल्याउने प्रयास गरिएकोमा पहिलो वर्षको उत्पादनले किसानलाई उत्साहित बनाएको छ । स्थानीय अगुवा कृषकका अनुसार गोगनपानीको माटो र हावापानी अकबरे खुर्सानीका लागि अनुकूल देखिएको छ ।

नमुना टोलका खेतबारीमा फलेका खुर्सानी टिप्न अहिले किसान व्यस्त छन् । टिपिएका खुर्सानीको गुणस्तरअनुसार वर्गीकरण गर्ने, प्याकेजिङ गर्ने र बजारसम्म ढुवानीको व्यवस्था मिलाउने काम भइरहेको छ । उत्पादन बजार पठाउने अन्तिम तयारीसँगै किसानको ध्यान बिक्री व्यवस्थापनमा केन्द्रित भएको छ । परीक्षण सफल भएको अनुभवका आधारमा उनीहरूले अकबरेलाई व्यावसायिक खेतीका रूपमा अघि बढाउने सम्भावना देखेका छन् ।

“सुरुमा परीक्षणका लागि मात्रै थोरै क्षेत्रफलमा लगाएका थियौँ, तर उत्पादन असाध्यै राम्रो भयो,” एक स्थानीय कृषकले भने, “अहिले बजारमा अकबरेको माग उच्च रहेकाले उचित मूल्य पाउनेमा हामी ढुक्क छौँ ।” उत्पादनप्रतिको सन्तुष्टिसँगै बजारबाट उचित प्रतिफल प्राप्त हुने अपेक्षा किसानमा छ । यद्यपि, उनीहरूको उक्त अपेक्षा अहिले बिक्रीको तयारीसँग जोडिएको छ ।

यहाँ उत्पादित खुर्सानी स्थानीय स्तरमा खपत हुनुका साथै जिल्लाभित्र र बाहिरका बजारमा पठाउने तयारी भइरहेको छ । जिल्ला सदरमुकाम सिन्धुलीमाढी, खुर्कोट तथा काठमाडौँसम्म पु¥याउने गरी किसानले व्यवस्था मिलाइरहेका छन् । स्थानीय खपतसँगै यी बजारसम्म उत्पादन पु¥याउने तयारीले नमुना खेतीलाई बिक्रीसँग जोड्ने चरणमा प्रवेश गराएको छ । त्यसका लागि खुर्सानी टिप्ने कामसँगै वर्गीकरण, प्याकेजिङ र ढुवानीको तयारी अघि बढाइएको हो ।

पहिलो वर्षको परीक्षण सफल भएपछि किसानले आगामी दिनमा खेतीको क्षेत्रफल विस्तार गर्ने योजना बनाएका छन् । गोगनपानीलाई नै अकबरे खुर्सानीको पकेट क्षेत्रका रूपमा विकास गर्ने उनीहरूको लक्ष्य छ । थोरै क्षेत्रफलबाट सुरु गरिएको खेतीमा अपेक्षाभन्दा राम्रो उत्पादन भएपछि विस्तारको योजना अघि सारिएको स्थानीय कृषक बताउँछन् । परम्परागत बालीबाट उचित प्रतिफल नपाएको अवस्थामा नमुना कार्यक्रमको नतिजाले उनीहरूलाई व्यावसायिक कृषितर्फ अघि बढ्न उत्साह दिएको छ ।

किसानले खेती विस्तारको योजनासँगै प्राविधिक सहयोग र बजार व्यवस्थापनमा सहजीकरणको आवश्यकता पनि औँल्याएका छन् । गाउँपालिका तथा कृषि शाखाबाट थप सहयोग प्राप्त भए अकबरे खेतीमार्फत जीवनस्तर उकास्न सकिने स्थानीयको भनाइ छ । उनीहरूले उत्पादनको सफलतालाई आगामी विस्तारसँग जोड्न चाहेका छन् । अहिले भने खेतबारीमा तयार भएका खुर्सानी टिपेर व्यवस्थित रूपमा बजार पठाउनु उनीहरूको तत्कालको प्राथमिकता बनेको छ । परीक्षणबाट प्राप्त उत्साहलाई बिक्रीको प्रतिफलसँग जोड्ने अपेक्षासहित गोगनपानीका किसान बजार पठाउने अन्तिम तयारीमा जुटिरहेका छन् ।स्रोतः सिन्धुली सेरोफेरो