सिन्धुली,७ पुस – नेपाल र चीनबीच भएको द्विपक्षीय समझदारीले नेपाली कृषि तथा पशुपालन क्षेत्रलाई अन्तर्राष्ट्रिय बजारसम्म पु¥याउने अर्को महत्वपूर्ण ढोका खोलेको छ । सोही समझौताअनुसार नेपाली राँगा–भैंसीको मासु चीन निर्यात गर्ने उद्देश्यसहित सिन्धुली जिल्लाको मरिण गाउँपालिकामा आधुनिक मासु प्रशोधन केन्द्र निर्माण कार्य औपचारिक रूपमा सुरु गरिएको छ । यसलाई स्थानीय तहदेखि राष्ट्रिय अर्थतन्त्रसम्म प्रभाव पार्ने दीर्घकालीन परियोजनाका रूपमा हेरिएको छ ।

सरकार, निजी क्षेत्र र स्थानीय तहको सहकार्यमा अघि बढाइएको यो परियोजनाले नेपाल–चीन व्यापारिक सम्बन्धलाई व्यवहारिक कार्यान्वयनको चरणमा पु¥याएको सरोकारवालाहरूको भनाइ छ । हालसम्म कागजी सहमति र नीति तहमा सीमित देखिँदै आएको पशुजन्य उत्पादन निर्यात अब भौतिक संरचना निर्माणसँगै व्यवहारमा रूपान्तरण हुन थालेको संकेत यो परियोजनाले दिएको छ ।

मरिण गाउँपालिकामा निर्माण हुन लागेको उक्त मासु प्रशोधन केन्द्र अन्तर्राष्ट्रिय मापदण्डअनुसार सञ्चालन गरिने जनाइएको छ । केन्द्रमा पशु वध, मासु प्रशोधन, प्याकेजिङ, चिस्यान भण्डारण (कोल्ड स्टोरेज) र गुणस्तर परीक्षणका सम्पूर्ण संरचना रहनेछन् । विशेष गरी चिनियाँ बजारको स्वास्थ्य, सरसफाइ र खाद्य सुरक्षासम्बन्धी मापदण्डलाई केन्द्रमा प्राथमिकताका साथ लागू गरिने योजना रहेको छ ।

स्थानीय जनप्रतिनिधिहरूका अनुसार यो परियोजनाले मरिण मात्र होइन, सिंगो सिन्धुली जिल्लाको आर्थिक गतिविधिमा उल्लेखनीय परिवर्तन ल्याउने अपेक्षा गरिएको छ । केन्द्र सञ्चालनमा आएपछि स्थानीय किसानले उत्पादन गरेको राँगा–भैंसीले सुनिश्चित बजार पाउनेछन् । यसले पशुपालनलाई व्यावसायिक बनाउँदै किसानको आम्दानी वृद्धि गर्ने विश्वास गरिएको छ ।

परियोजनाबाट प्रत्यक्ष र अप्रत्यक्ष रूपमा ठूलो संख्यामा रोजगारी सिर्जना हुने अनुमान गरिएको छ । केन्द्रमै प्राविधिक, प्रशासनिक र श्रमिक गरी सयौँ जनाले रोजगारी पाउनेछन् भने पशु आपूर्ति, ढुवानी, चारा उत्पादन र सहायक सेवामार्फत थप रोजगारीका अवसर खुल्नेछन् । यसले वैदेशिक रोजगारीमा निर्भर स्थानीय युवालाई आफ्नै गाउँठाउँमा काम गर्ने वातावरण तयार गर्ने अपेक्षा गरिएको छ ।

सरकारी अधिकारीहरूका अनुसार चीनजस्तो विशाल बजारमा नेपाली मासुको पहुँच विस्तार हुनु राष्ट्रिय अर्थतन्त्रका लागि महत्वपूर्ण उपलब्धि हो । नेपालमा पशुपालनको पर्याप्त सम्भावना हुँदाहुँदै पनि बजार र प्रशोधन संरचनाको अभावका कारण किसानले उचित मूल्य पाउन सकेका थिएनन् । मरिणमा सुरु भएको यो परियोजनाले त्यो अभाव क्रमशः अन्त्य गर्ने विश्वास लिइएको छ ।

चीनमा नेपाली राँगा–भैंसीको मासु निर्यात सुरु भएपछि व्यापार सन्तुलनमा समेत सकारात्मक प्रभाव पर्ने आँकलन गरिएको छ । हाल नेपाल–चीन व्यापारमा आयातको मात्रा अत्यधिक रहेको अवस्थामा निर्यात बढ्नुले विदेशी मुद्रा आर्जनमा टेवा पुग्नेछ । यसले कृषि तथा पशुपालनलाई परम्परागत जीविकोपार्जनको क्षेत्रबाट निर्यातमुखी उद्योगमा रूपान्तरण गर्ने दिशामा कदम चालेको संकेत गर्छ ।

स्थानीय बासिन्दाले भने परियोजनाप्रति आशा र अपेक्षा दुवै व्यक्त गरेका छन् । विगतमा पनि विभिन्न विकास योजनाहरू घोषणा भए तर अपेक्षित रूपमा कार्यान्वयन हुन नसकेको अनुभव स्मरण गर्दै उनीहरूले यस परियोजनालाई दीर्घकालीन र पारदर्शी रूपमा अघि बढाउन सरकार र सम्बन्धित पक्षको ध्यानाकर्षण गराएका छन् । वातावरणीय सन्तुलन, पशु कल्याण र स्थानीय हितलाई बेवास्ता नगरी काम हुनुपर्ने उनीहरूको माग छ ।

सरकारले भने परियोजना समयमै सम्पन्न गरी उत्पादन परीक्षण र निर्यात प्रक्रिया छिट्टै सुरु गर्ने लक्ष्य लिएको जनाएको छ । आवश्यक कानुनी, प्राविधिक र कूटनीतिक समन्वयलाई तीव्रता दिइएको र चीनसँगको समझदारी कार्यान्वयनमा कुनै कसर बाँकी नराखिने आश्वासन सम्बन्धित निकायले दिएका छन् ।

मरिणमा सुरु भएको मासु प्रशोधन केन्द्र निर्माण केवल एउटा भौतिक संरचना मात्र नभई नेपाली कृषि अर्थतन्त्रलाई नयाँ दिशातर्फ डो¥याउने प्रयासका रूपमा हेरिएको छ । सफल कार्यान्वयन हुन सके यसले अन्य जिल्लामा पनि यस्तै परियोजनाका लागि मार्गप्रशस्त गर्नेछ । नेपाली उत्पादनले अन्तर्राष्ट्रिय बजारमा पहिचान बनाउने यो प्रयासले देशको आर्थिक भविष्यमा सकारात्मक संकेत दिएको छ ।