सिन्धुली – सिन्धुलीको गोलन्जोर गाँउपालिका–७ निवासी कुमारी खड्काले आफ्नो करेसाबारीमा उत्पादित सागसब्जी सहजै हाट बजारसम्म लगेर बिक्री गरिरहनुभएकोछ । प्रत्येक हप्ताको आईतबार खुर्कोट बसपार्कमा लाग्ने आईतबारे हाटबजारमा कारण आफ्नो करेसाबारी तथा खोरगोठमा उत्पादन भएको तरकारी र खसी, बोका, कुखुरा बिक्री गर्न आफुलाई सजिलो भएको उहाँले सुनाउनुभयो । उहाँले भन्नुभयो, “आफ्नो उत्पादन बिक्री गर्दा हुने आम्दानीले आवश्यकता अनुसार नुन, तेल, जिरा तथा अन्य दैनिक उपभोग्य बस्तु खरिद गरेर फर्किन्छु ।”

यहाँ उत्पादन भएको साग सब्जीको बजार माग बढी हुँदा कृषकलाई मागअनुसार पुर्‍याउन कठिनाइ भएको उहाँले बताउनुभयो । हाटबजार सञ्चालनमा ल्याएपछि यस क्षेत्रका कृषकलाई कृषि उपजहरु बजारीकरणका लागि सजिलो भएको खडकाले बताउनुभयो ।

उहाँले भन्नुभयो, “ याहँ हाटबजार सञ्चालनमा आएपछि कृषि उपज सामग्री बजारीकरणको माध्यम हाटबजार बनेको छ । हाटबजारबाटै कृषि उपज सामग्री बिक्री गर्न पाउँदा उपभोक्तालाई पनि सजिलो भएको छ ।” आउत्पादित सामग्रीको माग उच्च हुन थालेपछि यहाँका कृषक हर्षित भएको उहाँको भनाइ छ ।

“गाँउ घरमा धेरै बिक्दैन, हाटबजारमा ल्याउन बिक्री गर्न समस्या हुदैन,” उहाँले भन्नुभयो, “त्यसैले प्राय प्रत्येक हप्ता हाटबजार आउने गरेको छु । हाटबजार साथिभाई भेटघाट गर्ने थलो पनि भएको छ ।” आफुले उक्त हाटबजारमा ल्याएर आफ्नो उत्पादन बिक्री गर्न थालेको पाँच बर्षभन्दा बढी भएको उहाँले जानकारी दिनुभयो ।

हाटबजारमा ग्रामीण किसानले सानो परिमाणमा बिक्री ल्याउने सागसब्जी तथा खाद्यान्न अर्गानिक हुने भएकाले उपभोक्ता पनि उनीहरुको उत्पादन खरिद गर्न आकर्षित हुने गरेको पाईन्छ ।

त्यस्तै तीनपाटन गाँउपालिकाको केन्द्र चकमके बजारमा पनि प्रत्येक हप्ताको शुक्रबार हाटबजार लाग्दै आएको छ । उद्योग बाणिज्य संघ चकमके शाखाका निबर्तमान् अध्यक्ष आनन्द कार्कीका अनुसार उक्त बजारमा २०५२ सालदेखि उक्त हाटबजार लाग्न सुरु गरेको हो ।

जिल्लाका विभिन्न ठाँउमा हप्ताको विभिन्न दिन (बार) लाग्ने त्यस्ता हाटबजार उत्पादक र उपभोक्तालाई जोड्ने माध्यम पनि बनेको उहाँको बुझाई छ । निबर्तमान् अध्यक्ष कार्कीले भन्नुभयो, “बजार अभावमा किसानको उत्पादन गाँउघरमा कमै मात्रामा बिक्री हुन्छ । उनीहरुलाई आफ्नो उत्पादन बिक्रि गर्न हाटबजारमा ल्याउदा सजिलो हुदै पनि आएको छ ।”

कमलामाई नगरपालिका–१४ चन्दनपुरमा पनि बुधबार हाटबजार लाग्न भर्खरै सुरु भएको छ । चन्दनपुर बजार व्यवस्थापन समितिको सक्रियतामा माघ २ गतेदेखि उक्त हाटबजार लाग्न सुरु भएको स्थानीय बासिन्दा बताउछन् । उक्त बजार व्यवस्थापन समितिका अध्यक्ष झल्ला अधिकारी दनुवार आ–आफ्नो रुचि र स्वाद अनुसारका वस्तु किनबेच र विनिमय गर्न पाइने भएकाले यस्ता हाटबजार उत्पादक र उपभोक्तालाई प्रत्यक्ष जोड्ने माध्यमका बनेको बताउनुहुन्छ ।

चन्दनपुरमा प्राय दनुवार समुदायका मानिसको बाहुल्यता रहेको र दनुवार समुदायका मानिससँग मान्द्रो, डालो र नाङलो बुन्ने सिप भएकाले उक्त हाटबजारले उनीहरुको सिपलाई प्रबद्र्धन गर्न सहयोग पुग्ने उहाँको भनाई छ ।