काठमाडौं,३० असार – गुडिरहेको रेलभित्र विवाहपछिको पहिलो रातका लागि तयार पारिएको ‘हनीमून सुइट’ जस्तै देखिने एउटा विशेष केबिनको भिडियो सामाजिक सञ्जालमा तीव्र रूपमा भाइरल भएपछि त्यसले व्यापक बहस र जिज्ञासा उत्पन्न गरेको छ । पहिलो श्रेणी (१ एसी) को एउटा निजी केबिनलाई बेलुन, गुलाबका फूल, रङ्गीन बत्ती तथा प्रेमका प्रतीकात्मक सजावटले सिंगारिएको दृश्य सार्वजनिक भएसँगै यसले यात्रुहरूको सिर्जनशीलता, व्यक्तिगत स्वतन्त्रता, रेलको सुरक्षा तथा सरकारी सम्पत्तिको प्रयोगसम्बन्धी प्रश्नहरू एकैसाथ उठाएको हो ।

भिडियोमा देखिने केबिनको सजावटले सामान्य रेल यात्राभन्दा विल्कुल फरक अनुभवको आभास गराउँछ । केबिनभित्र प्रवेश गर्नेबित्तिकै कुनै आधुनिक होटलको हनीमुन सुइटमा पुगेजस्तो वातावरण सिर्जना गरिएको देखिन्छ । सम्पूर्ण केबिन रङ्गीचङ्गी बेलुन, मसिना ध्वजापतका र राता गुलाबका फूलले सजाइएको छ । भित्ताभरि गुलाबका फूल टाँसिएका छन् भने भुइँभरि फूलका पत्रहरू छरिएका देखिन्छन् ।

केबिनको सिलिङमा थुप्रै बेलुन झुन्ड्याइएको छ । बस्ने तथा सुत्ने बर्थमा गुलाबका पत्र प्रयोग गरी आकर्षक मुटुको आकृति बनाइएको छ । भित्तामा सजाइएका फूलहरूको बिचमा साना रङ्गीन बत्ती जडान गरिएका छन् भने ‘आई लभ यू’ लेखिएको सन्देशले सजावटलाई अझ विशेष बनाएको छ । केबिनभित्र रहेको डस्टबिनलाई समेत फूलको गुच्छा जस्तै देखिने गरी सजाइएको भिडियोमा देख्न सकिन्छ ।

प्राप्त जानकारीअनुसार उक्त सजावट कुनै व्यावसायिक कार्यक्रम वा रेलवे प्रशासनको पहलमा नभई एक यात्रुले आफ्ना जीवनसाथीलाई यात्राकै क्रममा अविस्मरणीय सरप्राइज दिन आफ्नै खर्च र मिहिनेतमा गरेका थिए । यही तथ्य सार्वजनिक भएपछि सामाजिक सञ्जालमा धेरै प्रयोगकर्ताले यसलाई प्रेमको सुन्दर अभिव्यक्ति र सिर्जनशील प्रयासका रूपमा प्रशंसा गरेका छन् ।

यद्यपि, अर्कोतर्फ यस्तै सजावटले रेलको सुरक्षा, विद्युत् प्रणाली तथा सरकारी सम्पत्तिको प्रयोगसम्बन्धी नियम उल्लङ्घन गरेको हो कि होइन भन्ने प्रश्न पनि उठ्यो। धेरै प्रयोगकर्ताले भारतीय रेलवे तथा रेल मन्त्रीलाई सामाजिक सञ्जालमार्फत ट्याग गर्दै गुडिरहेको रेलभित्र यसरी भित्तामा सामग्री टाँस्ने, रङ्गीन बत्ती जडान गर्ने तथा अन्य सजावट गर्न अनुमति छ कि छैन भन्ने विषयमा स्पष्टीकरण मागेका थिए ।

सार्वजनिक चासो बढेपछि भारतीय रेलवे स्रोतले यस विषयमा आफ्नो आधिकारिक धारणा सार्वजनिक गरेको छ । रेलवेका अनुसार पहिलो श्रेणी (१ एसी) को निजी केबिन बुक गर्ने यात्रुलाई यात्रा अवधिभर पूर्ण गोपनीयता र व्यक्तिगत प्रयोगको सुविधा प्रदान गरिन्छ । सम्बन्धित यात्रुले पूरा केबिन आरक्षण गरेपछि सो स्थान उनीहरूकै प्रयोगका लागि छुट्याइएको हुन्छ र त्यसको प्रयोग उनीहरूको सुविधा तथा सहजताअनुसार गर्न सकिने व्यवस्था रहेको रेलवेले जनाएको छ ।

रेलवे अधिकारीहरूका अनुसार कुनै यात्रुले आफ्नो व्यक्तिगत खुसी वा विशेष अवसरलाई स्मरणीय बनाउन आफ्नै खर्चमा केबिन सजाउने निर्णय गरेमा त्यसमा भारतीय रेलवेको कुनै प्रत्यक्ष भूमिका रहँदैन । यात्रुले आफ्नो आरक्षित स्थानलाई आफूअनुकूल आरामदायी वा आकर्षक बनाउने विषय व्यक्तिगत स्वतन्त्रताको दायराभित्र पर्ने भएकाले यस्तो कार्यले रेलवेको नियम वा कानुनको उल्लङ्घन नगर्ने रेलवेले स्पष्ट पारेको छ ।

गुडिरहेको रेलभित्र गरिएको उक्त सजावटले सामाजिक सञ्जालमा प्रेम, सिर्जनशीलता, व्यक्तिगत स्वतन्त्रता र सार्वजनिक सेवाको प्रयोगबीचको सन्तुलनबारे नयाँ बहस सुरु गराएको छ । भारतीय रेलवेको स्पष्टीकरणपछि भने भाइरल भिडियोसँग जोडिएका कानुनी र प्रशासनिक अन्योल धेरै हदसम्म अन्त्य भएको छ ।