सिन्धुली,- कमलामाई नगरपालिका वडा नं. ५ भित्र पर्ने मुख्य सडक अहिले विकासको उदाहरणभन्दा पनि लापरबाहीको प्रतीक बनेको छ । नगरपालिकाको मुटु मानिने यो सडक लामो समयदेखि जीर्ण अवस्थामा रहे पनि सम्बन्धित निकाय भने मौन देखिएको भन्दै स्थानीय बासिन्दाले तीव्र असन्तुष्टि व्यक्त गरेका छन् । सडकको अवस्था यस्तो छ कि यहाँ यात्रा गर्ने जो–कोहीलाई नगरपालिकाको विकासको वास्तविक चित्र यही हो कि भन्ने प्रश्न उठ्न थालेको छ ।

स्थानीयका अनुसार यो सडक निर्माण भएको धेरै समय नबित्दै भत्किन थालेको थियो । अहिले सडकभरि खाल्डाखुल्डी, उबडखाबड सतह र धुलोले भरिएको छ । दैनिक रुपमा मोटरसाइकल, साना सवारीसाधन तथा पैदलयात्रु यही बाटो प्रयोग गर्न बाध्य छन् । तर सडकको अवस्था यस्तो भएको कारण सवारी चलाउँदा दुर्घटनाको जोखिम बढेको छ भने पैदलयात्रुहरूलाई समेत निकै कठिनाइ भोग्नु परेको छ । विशेष गरी वर्षायाममा यो सडक झन् समस्याग्रस्त बन्ने स्थानीयको अनुभव छ । 

कमलामाई नगरपालिका विकास र समृद्धिको नारासहित अघि बढिरहेको दाबी गरिए पनि नगरपालिकाको केन्द्रमै पर्ने सडक यस्तो अवस्थामा हुनु आफैंमा गम्भीर प्रश्न बनेको छ । स्थानीयले कर तिरेर पनि आधारभूत सुविधा नपाउनु विडम्बना भएको बताएका छन् । उनीहरू भन्छन्, “हामीले तिरेको कर आखिर कहाँ प्रयोग भइरहेको छ ? सडक मर्मतका लागि हो कि कर्मचारीको तलब भत्ता दिन मात्र हो ?” नगरपालिकाको मुटु मानिने स्थानमै यस्तो अवस्था हुँदा नागरिकमा निराशा बढेको देखिन्छ ।

निर्माण भएको छोटो समयमै सडक बिग्रिनुले ठेकेदारको लापरबाही हो कि अनुगमनको कमजोरी भन्ने विषयमा स्थानीयले प्रश्न उठाएका छन् । तर हालसम्म सम्बन्धित निकायबाट यस विषयमा स्पष्ट जानकारी सार्वजनिक गरिएको छैन । नगरपालिकाले विकासका विभिन्न योजना सार्वजनिक गरिरहेको भए पनि स्थानीयले प्रत्यक्ष रुपमा अनुभव गर्ने पूर्वाधार भने उपेक्षित अवस्थामा रहेको उनीहरूको गुनासो  छ ।

दैनिक रूपमा सयौँ मानिसले प्रयोग गर्ने यो सडक अहिले धुलो र खाल्डाखुल्डीले भरिएको छ। सडकको दुर्दशाका कारण व्यापार व्यवसायमा समेत असर परेको व्यवसायीहरूको भनाइ छ । धुलोका कारण पसलमा बस्न कठिन भएको र ग्राहकलाई पनि समस्या हुने गरेको उनीहरूले बताएका छन् । अर्कोतर्फ सवारी साधन बिग्रिने समस्या पनि बढ्दै गएको स्थानीयको अनुभव छ ।

यस्तो अवस्थामा स्थानीयले नगरपालिकासँग स्पष्ट जवाफ माग्न थालेका छन् । आखिर यो सडकको जिम्मेवारी कसको हो, किन समयमै मर्मत भएन, र अब कहिले निर्माण हुन्छ भन्ने विषयमा सम्बन्धित निकायले जवाफ दिनुपर्ने उनीहरूको माग छ । नगरपालिकाको मुख्य सडक नै यस्तो अवस्थामा रहँदा विकासका ठूला नारा नागरिकका लागि विश्वासयोग्य नदेखिएको टिप्पणी समेत हुन थालेको छ ।

स्थानीय बासिन्दाहरूले अब छिटोभन्दा छिटो सडक मर्मत तथा पुनःनिर्माणको काम सुरु गर्न नगरपालिकासँग माग गरेका छन् । अन्यथा वर्षौँदेखि झेल्दै आएको समस्या अझै लम्बिने र नागरिकको धैर्य समाप्त हुन सक्ने उनीहरूले चेतावनी दिएका छन् । नगरपालिकाको मुटुमा रहेको यो सडक सुधार हुने कि यस्तै अवस्थामा रहने भन्ने प्रश्न अहिले स्थानीय समुदायमा सबैभन्दा बढी उठिरहेको विषय बनेको छ ।