सिन्धुली,२९ माघ – सिन्धुली क्षेत्र नम्बर २ मा मुढा चिन्हबाट उम्मेदवारी दिएका महेश्वर दाहालले आफ्नो चुनावी अभियानलाई पार्टीभित्रको नेतृत्व शैलीविरुद्धको संघर्षका रूपमा प्रस्तुत गरेका छन् । बिहिवार सामाजिक सञ्जाल फेसबुकमार्फत सार्वजनिक धारणा व्यक्त गर्दै दाहालले फागुन २१ पछि मुढा चिन्हमा मत दिनेहरूको भविष्यबारे उठाइएका प्रश्नको जवाफ स्पष्ट रहेको दाबी गरेका छन् । “हामी जित्छौँ,” उनले लेखेका छन् ।

नेपाली कम्युनिष्ट पार्टीबाट विद्रोह गरी स्वतन्त्र हैसियतमा चुनावी मैदानमा उत्रिएका दाहालले आफूहरू संसदमा पुगेपछि भ्रष्टाचारविरुद्ध कडा रूपमा आवाज उठाउने प्रतिबद्धता जनाएका छन् । अपारदर्शी ढंगले आर्जित सम्पत्तिको छानबिन गरी राष्ट्रियकरण गर्ने कानुन निर्माणका लागि पहल गर्ने उनको घोषणा छ । उनले भ्रष्टाचारविरुद्ध कानुनी तथा संरचनागत सुधार आवश्यक रहेको उल्लेख गर्दै जनतासँग त्यसका लागि मत मागेका छन् ।

पार्टी नेतृत्वप्रति असन्तुष्टि व्यक्त गर्दै दाहालले आफू र पार्टीबाट निष्कासित हरिबोल गजुरेललाई कुनै पनि कमिटीले अनुमोदन गर्न नसक्ने जिकिर गरेका छन् । उनका अनुसार सिन्धुलीको चुनावी प्रक्रिया र यससँग सम्बन्धित निर्णयमा शीर्ष नेतृत्व अल्पमतमा रहेको दाबी गरिएको छ । “सिन्धुलीको चुनावमा गरिएको स्वेच्छाचारितालाई कुनै पनि कमिटीले अनुमोदन गर्न सक्दैन,” उनले लेखेका छन् ।

दाहालले सिन्धुलीमा आफ्नो विजयले पार्टी नेतृत्वमाथि नैतिक दबाब सिर्जना गर्ने दाबी गरेका छन् । उनले पछिल्लो समय पार्टीभित्र देखिएको स्वेच्छाचारिता, भ्रष्ट चरित्र र परिवारवाद कमजोर बन्दै जाने विश्वास व्यक्त गरेका छन् । राजनीतिलाई सेवाको माध्यम ठान्ने समूह बलियो बन्दै जाने र जनताको पक्षमा राजनीति अघि बढ्ने उनको भनाइ छ ।

चुनावी माहोल तात्दै जाँदा सिन्धुली–२ मा दाहालको उम्मेदवारीलाई आन्तरिक असन्तुष्टिको प्रतिनिधिका रूपमा हेरिएको छ । पार्टी संरचनाभित्र देखिएको विवाद र नेतृत्वप्रतिको प्रश्नले स्थानीय राजनीतिमा नयाँ समीकरणको संकेत दिएको विश्लेषण गरिएको छ । दाहालले आफ्नो अभियानलाई ‘राजनीतिमा नयाँ अध्यायको सुरुवात’का रूपमा चित्रण गर्दै मतदातासँग समर्थनको अपिल गरेका छन् ।

सिन्धुलीमा हुने प्रतिस्पर्धाले केवल एक संसदीय सिटको नतिजा मात्र होइन, पार्टीभित्रको शक्ति सन्तुलनमा समेत प्रभाव पार्न सक्ने आकलन गरिएको छ । चुनावी परिणामले दाहालको दाबी कति व्यवहारिक हुन्छ भन्ने विषयमा चासो बढेको छ ।