शुक्रवार , आश्विन ३१, २०८२
काठमाडौँ,३१ असोज – राष्ट्रिय परीक्षा बोर्डले कक्षा ११ को पुराना आंशिक तथा ग्रेड वृद्धि परीक्षाको नतिजा सार्वजनिक गरेको छ । शुक्रबार बोर्डले गोरखापत्रमार्फत सूचना प्रकाशित गर्दै नतिजा सार्वजनिक गरेको हो ।
बोर्डका अनुसार आंशिक परीक्षातर्फ सहभागी नौ हजार ९३४ विद्यार्थीमध्ये पाँच हजार ९१६ जना उत्तीर्ण भएका छन्। त्यस्तै, ग्रेड वृद्धितर्फ चार हजार ९७६ जना परीक्षार्थीमध्ये तीन हजार ५४० जना सफल भएका छन् ।
यसरी दुवै समूह गरी कूल १३ हजार ९१० विद्यार्थीले परीक्षा दिएकोमा नौ हजार ४५६ जना विद्यार्थीले उत्तीर्णता हासिल गरेका छन्। दुई जनाको परीक्षा भने रद्द गरिएको बोर्डले जनाएको छ ।
बोर्डका अनुसार नतिजा राष्ट्रिय परीक्षा बोर्डको वेबसाइट, नेपाल टेलिकमको वेबसाइट तथा १६०० नम्बरमा एसएमएस पठाएर हेर्न सकिनेछ । साथै १६०० वा ८१६०१३ नम्बर डायल गरी प्राप्त निर्देशनअनुसार पनि नतिजा थाहा पाउन सकिने व्यवस्था गरिएको छ ।
बोर्डले नतिजा प्रकाशनसँगै विद्यार्थीलाई आफ्नो ग्रेड सुधारका अवसरका रूपमा यस परीक्षाको उपयोग गर्न आग्रह गरेको छ । यस वर्षको आंशिक र ग्रेड वृद्धि परीक्षामा उत्तीर्ण दर करिब ६८ प्रतिशत रहेको अनुमान गरिएको छ ।
© 2026 All right reserved to sindhulisaugat.com
Design & Developed By
