आइतवार , भाद्र २२, २०८२
काठमाडौँ, २२ भदौ – हरेक वर्ष भदौ २२ गते मनाइने निजामती सेवा दिवसमा सरकारले ‘सर्वोत्कृष्ट’, ‘उत्कृष्ट’ र ‘निजामती’ पुरस्कार वितरण गर्दै आएकोमा यस वर्ष भने सरकारले ‘सर्वोत्कृष्ट निजामती कर्मचारी’ चयन गर्न सकेन । परम्पराअनुसार एक जनालाई दुई लाख रुपैयाँसहित सर्वोत्कृष्ट, १० जनालाई एक–एक लाख रुपैयाँसहित उत्कृष्ट र ३० जनालाई ५०–५० हजार रुपैयाँसहित निजामती पुरस्कार दिने गरिँदै आएको थियो । तर, यसपटक सरकारले “सर्वोत्कृष्ट कर्मचारी” नभेटिएको भन्दै उक्त श्रेणीको पुरस्कार नै रोकिएको छ ।
पछिल्लो पटक सन् २०७३ सालमा तत्कालीन सचिव शान्तराज सुवेदीले सर्वोत्कृष्ट निजामती सेवा पुरस्कार पाउनुभएको थियो । त्यसपछि भने लगातार वर्षहरूमा कसैलाई पनि यो सम्मान दिइएको छैन । यद्यपि, ‘उत्कृष्ट’ र ‘निजामती’ श्रेणीका पुरस्कारका लागि चयन भएका १० र ३० जना कर्मचारीहरूको नामावली विगतका वर्षमा गोरखापत्र दैनिकमार्फत सार्वजनिक हुने गरेकोमा यस वर्ष भने अहिलेसम्म नामावली प्रकाशित गरिएको छैन ।
यसैबीच, काठमाडौँमा सञ्चालन भइरहेको निजामती सेवा दिवसको मूल समारोहमा मुख्य सचिव एकनारायण अर्यालले विगतका वर्षझैँ यसपटक पनि पुरस्कार पाउने कर्मचारीहरूको नामावली छिट्टै सार्वजनिक गरिने आश्वासन दिनुभयो । यद्यपि, संघीय मामिला तथा सामान्य प्रशासन मन्त्रालयका प्रवक्ता कालीप्रसाद पराजुलीले भने यस वर्ष पुरस्कार घोषणा नै नगरिएको जानकारी दिनुभयो तर कारणबारे खुलाउन चाहनुभएन् ।
पोहोरसाल चयन भएका कर्मचारीलाई भने यस वर्ष आयोजित मुख्य समारोहमै उपप्रधानमन्त्री तथा सहरी विकास मन्त्री प्रकाशमान सिंहले पुरस्कार वितरण गर्नुभएको थियो । उता, समारोहमा सहभागी हुने भनिएका प्रधानमन्त्री केपी शर्मा ओली भने विधान महाधिवेशनमा व्यस्त रहेकाले कार्यक्रममा उपस्थित हुनुभएन ।
यसरी, लामो समयदेखि संस्थागत हुँदै आएको सर्वोत्कृष्ट निजामती कर्मचारी पुरस्कार यो वर्ष पनि खाली रहँदा यसले सरकारकै कर्मचारी मूल्यांकन प्रणालीप्रति प्रश्न खडा गरेको छ ।
© 2026 All right reserved to sindhulisaugat.com
Design & Developed By
