शनिवार , श्रावण ३१, २०८२
काठमाडौं, ३१ साउन – नेपाली काँग्रेसका प्रभावशाली नेता तथा सांसद डा. शेखर कोइरालाले सत्ता साझेदार दल नेकपा एमालेमाथि जमिनसँग सम्बन्धित मुद्दाहरूमा संलग्न भएको आरोप लगाउँदै कडा आलोचना गर्नुभएको छ । शनिबार काठमाडौंमा आयोजित एक कार्यक्रममा बोल्दै कोइरालाले एमालेलाई ’जहाँ खाली जग्गा, त्यहाँ एमाले’ भन्दै व्यंग्य गर्नुभयो ।
उहाँले हालै संसदमा पेश भएको भूमि सम्बन्धी विधेयकमाथि छलफल गर्न नदिइएकोमा पनि असन्तुष्टि व्यक्त गर्नुभयो । कोइरालाले भन्नुभयो, “हाम्रो पार्टीका सांसदहरूले यस विधेयकमा संशोधन प्रस्ताव राख्दा पनि त्यसमाथि छलफल गर्न दिइएन । यसले सरकारको नियतमाथि प्रश्न उठ्छ ।”
कोइरालाले नेकपा एमालेको आँखा देशका विभिन्न स्थानमा रहेका खाली जमिनहरूमाथि गइरहेको आरोप लगाउनुभयो । उनले यसको उदाहरण दिँदै गोकर्ण रिसोर्ट, राजा वीरेन्द्रको सम्पत्ति, पोखराको लिचीबारी, र गिरीबन्धु टिस्टेट जस्ता विवादित जग्गा प्रकरणहरूमा एमालेको संलग्नता रहेको दाबी गर्नुभयो । “जहाँ पनि तपाईं हेर्नुस्, जताततै एमालेको मात्रै सुनिन्छ,” उहाँले भन्नुभयो ।
नेता कोइरालाले सांसदहरू नै बिचौलियाको काम गर्न थालेको भन्दै देशको भविष्यमाथि चिन्ता व्यक्त गर्नुभयो । उहाँले रेशम चौधरीको पार्टीका एक सांसदलाई लक्षित गर्दै, “सांसद पनि बिचौलिया भइसकेपछि त देशको के अवस्था हुन्छ ?” भन्दै प्रश्न गर्नुभयो । उहाँको यो अभिव्यक्तिले संसदभित्र र बाहिर चलिरहेको राजनीतिक बहसलाई थप तताएको छ ।
कोइरालाको यो टिप्पणीले सत्तारुढ दल र प्रतिपक्षी दलहरूबीचको सम्बन्धमा थप तनाब सिर्जना गर्ने देखिएको छ । नेपाली राजनीतिमा जग्गा विवाद र भ्रष्टाचारका मुद्दाहरूले बारम्बार चर्चा पाउने गरेका छन् । यस घटनाले राजनीतिक दलहरूको नैतिकता र पारदर्शितामाथि पुनः एकपटक गम्भीर प्रश्न उठाएको छ ।
© 2026 All right reserved to sindhulisaugat.com
Design & Developed By
