शनिवार , श्रावण ३१, २०८२
काठमाडौं, ३१ साउन – भारतीय विदेश सचिव विक्रम मिस्री दुई दिने औपचारिक भ्रमणका लागि आइतबार नेपाल आउनुहुने भएको छ । नेपालका परराष्ट्र सचिव अमृतबहादुर राईको निमन्त्रणामा हुन लागेको यो भ्रमणलाई दुई देशबीचको नियमित उच्चस्तरीय आदानप्रदानको परम्पराको निरन्तरताका रूपमा हेरिएको छ । यो भ्रमणले नेपाल–भारत सम्बन्धलाई थप सुदृढ बनाउन महत्वपूर्ण भूमिका खेल्ने विश्वास गरिएको छ ।
भारतीय दूतावासले जारी गरेको विज्ञप्तिअनुसार, भारतले आफ्नो ‘छिमेकी पहिलो’ नीतिअन्तर्गत नेपालसँगको सम्बन्धलाई सधैँ उच्च प्राथमिकतामा राख्दै आएको छ । विदेश सचिवको यो भ्रमण सोही नीतिको निरन्तरता हो । यस भ्रमणका क्रममा दुई देशबीचको द्विपक्षीय सम्बन्धका विविध आयामहरूमा गहन छलफल हुने अपेक्षा गरिएको छ ।
भ्रमणको मुख्य एजेन्डामा प्रधानमन्त्री केपी शर्मा ओलीको आगामी भारत भ्रमणको तयारी रहेको बताइएको छ । प्रधानमन्त्री ओलीले भाद्रको अन्तिम सातामा भारत भ्रमण गर्ने तयारी रहेको र यसका लागि आवश्यक सबै तयारी र एजेन्डामा विदेश सचिव मिस्रीले आफ्ना नेपाली समकक्षीसँग छलफल गर्नुहुने छ । यस भ्रमणले दुवै देशका सरकार प्रमुखबीच हुने वार्ताका लागि एउटा ठोस आधार तयार गर्नेछ ।
यसका अतिरिक्त, भ्रमणका क्रममा नेपाल–भारत सीमा विवाद, व्यापार, ऊर्जा, कनेक्टिभिटी, र जलस्रोतसम्बन्धी विषयमा पनि छलफल हुने सम्भावना छ । दुई देशबीचको सम्बन्धमा समय–समयमा देखिने जटिलताहरूलाई समाधान गर्न र आपसी सहयोगका नयाँ क्षेत्रहरू पहिल्याउन यस प्रकारका उच्चस्तरीय भेटघाटहरू आवश्यक हुन्छन् ।
विदेश सचिव मिस्रीको यो भ्रमणलाई दुवै देशको सरकारले सकारात्मक रूपमा लिएका छन् । यसले नेपाल र भारतबीचको बलियो र मैत्रीपूर्ण सम्बन्धलाई थप प्रगाढ बनाउने अवसर प्रदान गर्नेछ। दुवै देशले आपसी विश्वास र समझदारीका साथ अगाडि बढ्ने प्रतिबद्धता यस भ्रमणमार्फत पुनः दोहोर्याउने अपेक्षा गरिएको छ ।
© 2026 All right reserved to sindhulisaugat.com
Design & Developed By
