मंगलवार , आषाढ १०, २०८२
काठमाडौं,१० असार – जनता समाजवादी पार्टी नेपालका अध्यक्ष उपेन्द्र यादवले वर्तमान सरकारलाई समर्थन फिर्ता लिएको घोषणा गर्नुभएको छ । मंगलबार भक्तपुरमा आयोजित एक कार्यक्रममा बोल्दै यादवले सरकारलाई दिएको समर्थन फिर्ता लिन संसदीय दललाई निर्देशन दिइसकेको समेत बताउनुभयो । उहाँले सत्तारुढ एमाले–काँग्रेस गठबन्धनको तीव्र आलोचना गर्दै सरकारलाई दिएको समर्थनबाट पछुताउनु परेको बताउनुभयो ।
सरकार जनताको पक्षमा नभइ बिचौलियाको लागि बनेकाले समर्थन कायम राख्नु संविधान,संघीयता र जनतासँग गद्दारी हुने उहाँको भनाइ छ ।
अध्यक्ष यादवले वर्तमान सत्ता गठबन्धनले जनताको कुनै चासो नराखी केवल सत्तामा टिकिरहने खेल खेलिरहेको आरोप लगाउनुभयो । सरकारको सम्पूर्ण ध्यान सत्ता जोगाउने, पद बाँड्ने, प्रशासन हल्लाउने र जनताको नाममा बजेट बेच्ने काममा लागेको उहाँले बताउनुभयो । उहाँले वर्तमान सत्ता गठबन्धन पूर्णरुपमा असफल भइसकेको उल्लेख गर्नुभयो ।
उहाँले संविधान संशोधन गर्ने सरकारको कुनै चाहना नभएको र सरकार बनाउनका लागि राजनीतिक स्टन्डमात्रै गरेको टिप्पणी गर्नुभयो । यादवले राजनीतिक नेतृत्वको सत्ता मोहबाट देश मुक्त हुनुपर्ने बेला आएको जिकिर गर्नुभयो ।
© 2026 All right reserved to sindhulisaugat.com
Design & Developed By
