बिहिवार , पौष १५, २०७८
काठमाडौं १५ पुस –– काठमाडौं जिल्ला अदालतले एमालेका पूर्वसांसद समेत रहेका सिभिल सेभिङ एण्ड क्रेडिट सहकारी संस्था लिमिटेड सोल्टीमोड, काठमाडौंका संस्थापक अध्यक्ष इच्छाराज तामाङलाई पुर्पक्षका लागि थुनामा पठाएको छ ।
न्यायाधीश राजकुमार कोइरालाको एकल इजलासले तामाङसँगै केशवलाल श्रेष्ठलाई पनि थुनामा पठाउने आदेश जारी गरेको हो । नेपाल प्रहरीको केन्द्रीय अनुसन्धान ब्यूरो सीआइबीले हिरासतमा राखी अनुसन्धानपश्चात् ठगी र संगठित अपराधको कसुरमा मुद्दा दायर गरेको थियो । तामाङसहित ४२ जनाविरुद्ध मुद्दा दायर गरेको थियो ।
निक्षेपकर्ताको रकम फिर्ता नहुने जोखिम रहेको भन्दै सरकारका तर्फबाट वकिलहरुले पुर्पक्षका लागि थुनामा राख्ने आदेशको गर्नुपर्ने जिकिर गरेका थिए ।
नेपाल प्रहरीको केन्द्रीय अनुसनधान ब्युरो (सिआईबी)का निर्देशक (डिआईजी) धिरजप्रताप सिंहले अदालतले तामाङसहितका व्यक्तिलाई पुर्पक्षका लागि थुनामा पठाउन आदेश दिएको जानकारी दिनु भयो । सीआईबीले अनुसन्धानको क्रममा तामाङसहित १२ जना प्रतिवादीहरू पक्राउ गरेको थियो ।
अदालतले ९ जनालाई धरौटी र एक जनालाई साधारण तारेखमा छाड्न आदेश भएको छ । अदालतले इच्छाराज तामाङ र केशवलाल श्रेष्ठ पुर्पक्षको लागी थुनामा पठाएको छ । हरिहर प्रसाद लामिछाने (पूर्वलेखासमिति सदस्य)सँग ५० लाख, विजयविक्रम शाह (वरिष्ठ प्रबन्धक)सँग १५ लाख, भगवानबहादुर सिंह डंगोलसँग १० लाख, एलिना तुलाधर (जुनियर असिस्टेन्ट म्यानेजर)सँग ५ लाख, मायोनानी महर्जनसँग ५ लाख, बुद्धराज तामाङसँग ५ लाख, कौस्तुभ केतन ढुंगानासँग ५ लाख, शंकरप्रसाद पाठकसँग २ लाख ५० हजार, राकेश महर्जनसँग ५० हजार धरौटी माग गरेको छ ।
अदालतले असिस्टेन्ट संगीत श्रेष्ठलाई भने साधारण तारिखमा छाडेको सीआईबीद्वारा जारी विज्ञप्तिमा उल्लेख छ । प्रहरीको केन्द्रीय अनुसन्धान ब्यूरो (सीआईबी) ले तामाङले ठगी गरेको निष्कर्षसहित ५ अर्ब ६७ करोड बिगो माग दाबी गर्दै जिल्ला सरकारी वकिलको कार्यालय, काठमाडौंमा अनुसन्धान प्रतिवेदन बुझाएको थियो । एमालेका पूर्वसांसद समेत रहेका तामाङविरुद्ध एक हजार ४९९ जनाले किटानी जाहेरी दिएका छन् ।
© 2026 All right reserved to sindhulisaugat.com
Design & Developed By
