पृथ्वीबाट करिब तीन लाख ८४ हजार किलोमिटर टाढा रहेको चन्द्रमामा अब केवल वैज्ञानिक अनुसन्धान मात्र होइन, मानिसको बसोबास र विश्रामसमेत सम्भव हुने कल्पना मूर्तरूप लिँदैछ । यही साहसी सोचका साथ एक अमेरिकी युवा उद्यमीले चन्द्रमामा संसारकै पहिलो होटल सञ्चालन गर्ने योजना सार्वजनिक गरेका छन् । आगामी सन् २०३२ सम्म होटल सञ्चालनमा ल्याउने लक्ष्यसहित उनले अहिले नै कोठाको अग्रिम बुकिङ खुला गरिसकेका छन्, जसले अन्तरिक्ष पर्यटनको नयाँ अध्याय सुरु भएको संकेत गर्छ ।

स्टार्टअप कम्पनीमार्फत अघि सारिएको यस योजनाअनुसार चन्द्रमामा बन्ने होटल विलासिता मात्र नभई प्रविधि र मानव साहसको प्रतीक हुने दाबी गरिएको छ । होटलका कोठाको अन्तिम मूल्य अझै तय नभए पनि एक कोठाको लागत एक करोड अमेरिकी डलरभन्दा बढी पर्न सक्ने अनुमान गरिएको छ । यद्यपि इच्छुक ग्राहकले पूरै रकम तुरुन्तै बुझाउनुपर्ने छैन। हाल कम्पनीले सुविधा अनुसार दुई लाख पचास हजारदेखि दस लाख डलरसम्म अग्रिम डिपोजिट लिन थालेको छ । यसले धनी र अन्तरिक्षप्रेमी वर्गलाई लक्षित गरिएको स्पष्ट संकेत दिन्छ ।

यसअघि पनि चन्द्रमामा होटल बनाउने घोषणा विभिन्न कम्पनीहरूले गरिसकेका थिए । तर यो योजना निर्माण प्रविधिका कारण फरक देखिन्छ । पृथ्वीबाट भारी निर्माण सामग्री र मेसिनरी पठाउनुको सट्टा चन्द्रमाकै माटो प्रयोग गरेर संरचना बनाउने तयारी गरिएको छ । रोबोटिक प्रविधिबाट चन्द्रमाको धुलो र माटोलाई बलिया ब्लकमा रूपान्तरण गरिने र ती ब्लकबाट कठोर विकिरण, तापक्रम र गुरुत्वाकर्षणका चुनौती झेल्न सक्ने संरचना निर्माण गरिनेछ । नियामक निकायको आवश्यक स्वीकृति प्राप्त भएमा सन् २०२९ बाट निर्माण कार्य सुरु हुने अपेक्षा गरिएको छ ।

कम्पनीका संस्थापकले मानव सभ्यता नयाँ मोडमा पुगेको दाबी गर्दै चन्द्रमा र मंगल ग्रहमा स्थायी बसोबास सम्भव हुने विश्वास व्यक्त गरेका छन् । उनका अनुसार आगामी पुस्ताले पृथ्वीबाहिर जन्मेर अन्तरग्रहीय जीवनको सौन्दर्य प्रत्यक्ष अनुभव गर्नेछन् । यो केवल व्यापारिक परियोजना मात्र नभई मानव जातिलाई अन्तरिक्षतर्फ डो¥याउने ऐतिहासिक कदम हुने उनको भनाइ छ ।

सानैदेखि अन्तरिक्षप्रति गहिरो चासो राख्दै आएका यी युवा उद्यमीले किशोरावस्थामै उड्डयन तालिम लिएका थिए । विश्वविद्यालय अध्ययनकै क्रममा उनले अन्तरिक्षमा प्रयोग हुने थ्रीडी प्रिन्टिङ प्रविधिमा योगदान दिएका थिए, जसको सफल परीक्षण अन्तरिक्षमै भइसकेको छ । गत वर्ष उनी सिलिकन भ्यालीको चर्चित स्टार्टअप सहायता कार्यक्रममा छनोट भई सबैभन्दा कम उमेरमा अन्तरिक्ष स्टार्टअप स्थापना गर्ने व्यक्तिका रूपमा चर्चामा आएका थिए ।

चन्द्रमामा होटल बनाउने यो साहसी योजना सफल भएमा, यो केवल समाचारको शीर्षक मात्र रहने छैन, मानव इतिहासकै एक निर्णायक मोडका रूपमा स्मरणीय बन्नेछ