सिन्धुली,२९ पुस – आगामी प्रतिनिधिसभा निर्वाचन नजिकिँदै जाँदा सिन्धुली–२ को राजनीतिक सरगर्मी तीव्र बन्दै गएको छ । प्रमुख दलहरू आ–आफ्ना सम्भावित उम्मेदवारको सिफारिस प्रक्रियामा सक्रिय देखिएका छन् भने भित्री छलफल, समीकरण र रणनीतिले चुनावी माहोललाई थप रोचक बनाइरहेको छ । विगतका निर्वाचन अनुभव, स्थानीय प्रभाव, वैचारिक निष्ठा र संगठनात्मक शक्ति यी सबै पक्षलाई तौलिँदै दलहरू अन्तिम निर्णयतर्फ अघि बढिरहेका छन् ।

यसै क्रममा प्रगतिशील लोकतान्त्रिक पार्टी ले आफ्ना वरिष्ठ नेता राम कार्की लाई सिन्धुली–२ बाट उम्मेदवारका रूपमा सिफारिस गरेको छ । पार्टीभित्र लामो समयदेखि सक्रिय कार्की बौद्धिक क्षमता, तर्कशीलता र वाकपटुताका कारण जिल्लामा परिचित नाम मानिन्छन् । स्थानीय मुद्दामा स्पष्ट दृष्टिकोण राख्ने र जनतासँग प्रत्यक्ष संवाद गर्न सक्ने नेताका रूपमा उनको छवि रहेको बताइन्छ । पार्टीका एक नेताका अनुसार कार्कीको उम्मेदवारीले शिक्षित वर्गसँगै युवापुस्तामा सकारात्मक सन्देश जाने विश्वास गरिएको छ ।

उता, नेपाली कम्युनिस्ट पार्टी (माओवादी केन्द्र) तर्फबाट सिन्धुली–२ का लागि फरक पृष्ठभूमिका नेताहरू चर्चामा छन् । वैचारिक निष्ठा र सादा जीवनशैलीका कारण अलग पहिचान बनाएका महेश्वर दाहाल पार्टीको सिफारिस सूचीमा परेका छन् । लामो समयदेखि पार्टीमा क्रियाशील रहँदै आएका दाहालले अहिलेसम्म प्रत्यक्ष निर्वाचनमा अवसर नपाएको पृष्ठभूमिमा यसपटक उनको दाबी बलियो देखिएको पार्टीभित्रकै विश्लेषण छ । पार्टी संयोजक पुष्पकमल दाहाल ‘प्रचण्ड’ र वरिष्ठ नेता हरिबोल गजुरेलसँगै सिफारिसमा परेका दाहालले अहिलेसम्म कुनै अवसर नपाएको पृष्ठभूमिमा पार्टीबाट उनको उम्मेदवारी बलियो देखिएको छ ।

पार्टी संयोजक पुष्पकमल दाहाल ‘प्रचण्ड’ ले पूर्वी रुकुमबाट उम्मेदवारी रोजिसकेको संकेत दिएका छन् भने वरिष्ठ नेता हरिबोल गजुरेल ले यसपटक चुनाव नलड्ने सार्वजनिक धारणा राखिसकेका छन् । गजुरेल यसअघि दुई पटक सांसद र एकपटक मन्त्री भइसकेकाले नयाँ नेतृत्वलाई अवसर दिनुपर्ने पक्षमा देखिएका छन् । यी कारणले पनि सिन्धुली–२ मा महेश्वर दाहाललाई अघि सार्ने सम्भावना बढ्दै गएको माओवादी केन्द्रका नेताहरू बताउँछन् । संगठनभित्र ‘स्थानीय अनुहार, दीर्घकालीन प्रतिबद्धता’ भन्ने तर्क बलियो हुँदै गएको उनीहरूको भनाइ छ ।

अर्कोतर्फ, नेकपा (एमाले) ले सिन्धुली–२ बाट मनोजजंग थापा लाई सिफारिस गरेको छ । माओवादी पृष्ठभूमिबाट एमालेमा आएका थापाले जनयुद्धकालमा पार्टीको अन्तर्राष्ट्रिय विभागमा काम गरेको अनुभव छ । यसअघि एमालेकै तर्फबाट निर्वाचन लडेका उनी पराजित भए पनि संगठन विस्तार र स्थानीय तहमा सक्रियताका कारण पुनः अवसर पाउन सफल भएको एमाले स्रोत बताउँछ । एमालेले यस क्षेत्रलाई प्रतिस्पर्धात्मक मान्दै सशक्त संगठन र अनुशासित कार्यकर्तामार्फत चुनाव जित्ने रणनीति बनाइरहेको छ ।

सिन्धुली–२ को राजनीतिक इतिहास हेर्दा यहाँ व्यक्तित्वभन्दा पनि दलगत समीकरण र स्थानीय मुद्दाले निर्णायक भूमिका खेल्ने गरेको देखिन्छ । सडक, शिक्षा, स्वास्थ्य, रोजगारी र कृषि जस्ता विषयमा मतदाताको अपेक्षा उच्च छ । यसै कारण उम्मेदवार चयनमा दलहरू अत्यन्त सतर्क देखिएका छन् । अन्तिम उम्मेदवार टुंगो लागेपछि मात्र चुनावी एजेन्डा स्पष्ट हुने र प्रचारप्रसारले गति लिने अनुमान गरिएको छ ।

राजनीतिक विश्लेषकहरूका अनुसार सिन्धुली–२ मा यसपटक त्रिपक्षीय प्रतिस्पर्धा हुने संकेत देखिएको छ । प्रगतिशील लोकतान्त्रिक पार्टी नयाँ विकल्पका रूपमा प्रस्तुत हुन खोज्दै छ भने माओवादी केन्द्र संगठनात्मक पकड जोगाउन प्रयासरत छ । एमाले भने विगतका कमजोरी सुधार्दै सशक्त पुनरागमनको रणनीतिमा देखिन्छ । अन्ततः उम्मेदवारको अन्तिम छनोट, गठबन्धनको अवस्था र स्थानीय मुद्दामा कसले विश्वसनीय योजना प्रस्तुत गर्छ भन्ने कुराले मतदाताको निर्णय निर्धारण गर्नेछ ।

अहिलेका लागि सिन्धुली–२ मा उम्मेदवार सिफारिसको चरणमै भए पनि राजनीतिक तापक्रम चुलिँदै गएको छ । दलहरूबीचको आन्तरिक प्रतिस्पर्धा, सार्वजनिक बहस र सम्भावित समीकरणले अन्तिम चुनावी दृश्य अझ रोचक बन्ने संकेत देखाएको छ ।