सिन्धुली,०७ मंसिर – पछिल्ला वर्षहरूमा ऐतिहासिक रूपमा प्रसिद्ध सिन्धुलीगढी आन्तरिक तथा बाह्य पर्यटकको प्रमुख आकर्षण केन्द्रका रूपमा उदाउँदै गएको छ । प्राकृतिक सौन्दर्य, ऐतिहासिक महत्व र सहज सडक पहुँचका कारण यहाँ पुग्ने पर्यटकको संख्या उल्लेख्य रूपमा बढ्दै गएको स्थानीय सरोकारवालाहरू बताउँछन् ।

नेपाल–अंग्रेज युद्धको समयमा नेपाली सेनाले ब्रिटिस फौजलाई पराजित गरेको गौरवपूर्ण इतिहास बोकेको सिन्धुलीगढी अहिले पर्यटकीय गन्तव्यका रूपमा नयाँ पहिचान बनाउँदैछ । हरियाली डाँडाकाँडा, मनोरम सूर्योदय र सूर्यास्तको दृश्य, चिसो हावापानी र शान्त वातावरणले पर्यटकलाई आकर्षित गरिरहेको छ ।

काठमाडौंबाट करिब पाँच घण्टाको यात्रामा पुग्न सकिने सिन्धुलीगढीको पहुँच सडक पछिल्ला वर्षहरूमा स्तरोन्नति भएपछि यहाँ पुग्नु अझ सहज भएको छ । विशेष गरी सप्ताहन्त र सार्वजनिक बिदाका दिनहरूमा यहाँ आन्तरिक पर्यटकको ठूलो भीड लाग्ने गरेको छ । दशैं, तिहार, नयाँ वर्ष र लामो बिदाको समयमा होटल तथा होमस्टेहरू भरिभराउ हुने गरेका छन् ।

स्थानीय तह र पर्यटनसँग सम्बन्धित निकायहरूले पनि सिन्धुलीगढीको प्रवद्र्धनमा विशेष ध्यान दिन थालेका छन् । बागमती प्रदेश सरकार तथा कमलामाई नगरपालिकाको सहकार्यमा ऐतिहासिक स्थलको सरसफाइ, पदमार्ग निर्माण, सूचनापाटी राख्ने, भ्यू–टावर निर्माणजस्ता पूर्वाधार विकासका कामहरू अघि बढाइएका छन् ।

यहाँ आउने पर्यटकका लागि गढी परिसरमा पैदल मार्ग, आरामस्थल, फोटो खिच्न मिल्ने आकर्षक स्थान र जानकारीमूलक बोर्डहरू थपिँदै गएका छन् । स्थानीय बासिन्दाका अनुसार पछिल्ला वर्षहरूमा पर्यटकको आगमनसँगै स्थानीय व्यवसाय पनि चलायमान बनेको छ । होटल, खाजा घर, पसल, यातायात सेवा र स्थानीय कृषि उत्पादनको बिक्रीमा उल्लेख्य वृद्धि भएको उनीहरू बताउँछन् ।

स्थानीय पर्यटक मात्र होइन, विदेशी पर्यटकको समेत चासो बढ्दै गएको छ । खासगरी इतिहास र प्राकृतिक पर्यटनप्रति रुचि राख्ने विदेशी पर्यटकहरू सिन्धुलीगढी पुगेर नेपाल–अंग्रेज युद्ध सम्बन्धी जानकारी लिने र फोटो तथा भिडियो सामग्री संकलन गर्ने गरेका छन् ।

स्थानीय पर्यटन व्यवसायीहरू सिन्धुलीगढीलाई ‘घुम्नैपर्ने गन्तव्य’ का रूपमा विकास गर्नुपर्नेमा जोड दिन्छन् । “यहाँ इतिहास, प्रकृति र संस्कृति सबै कुरा एकै ठाउँमा भेटिन्छ,” स्थानीय होटल व्यवसायी रमेश तामाङले भने, “सरकारले दीर्घकालीन योजना बनाएर प्रचार–प्रसार र पूर्वाधार विकास गरेमा सिन्धुलीगढीले राष्ट्रिय मात्र होइन, अन्तर्राष्ट्रिय स्तरमै पहिचान बनाउने सम्भावना छ । ”

यद्यपि, अझै पनि यहाँ केही चुनौतीहरू रहेका छन् । पर्याप्त शौचालय, फोहोर व्यवस्थापन, व्यवस्थित पार्किङ र अपांगमैत्री पूर्वाधारको अभाव रहेको स्थानीयको गुनासो छ । यस्ता समस्या समाधान गर्न सके पर्यटकको बसाइ अवधि बढाउने र स्थानीय अर्थतन्त्रलाई अझ मजबुत बनाउन सकिने सरोकारवालाहरू बताउँछन् ।

ऐतिहासिक गौरव, प्राकृतिक सौन्दर्य र स्थानीय आतिथ्य सत्कारको संगम बनेको सिन्धुलीगढी अहिले केवल इतिहासको साक्षी मात्र नभई भविष्यको पर्यटन सम्भावनाको केन्द्रका रूपमा उदाउँदै गएको छ । व्यवस्थित योजना र निरन्तर प्रवद्र्धन हुन सके यस क्षेत्रले समग्र सिन्धुली जिल्लाकै पहिचानलाई नयाँ उचाइमा पु¥याउने अपेक्षा गरिएको छ ।