बिहिवार , भाद्र १२, २०८२
काभ्रेपलाञ्चोक,१२ भदौ – निरन्तर परेको वर्षाका कारण अवरुद्ध भएको बीपी राजमार्गको रोशी खण्ड सञ्चालनमा आएको छ । बुधबार रातिदेखि अविरल वर्षापछि राजमार्गको चार ठाउँमा अवरोध सिर्जना भएको थियो । काभ्रेको रोशी गाउँपालिका–९ पिल्थलीबेशी र बिरुवाडाँडा, रोशी–११ को कालढुंगामा रहेको खहरे खोलामा आएको लेदो तथा रोशी–१२ माम्ती क्षेत्रमा सडक माथिबाट खसेको सुख्खा पहिरोले यातायात ठप्प पारेको थियो ।
इलाका प्रहरी कार्यालय मंगलटारका प्रमुख ईश्वर कार्कीका अनुसार बिहीबार बिहानैदेखि प्रहरी, सडक विभाग र स्थानीयको पहलमा अवरोध हटाउने काम सुरु गरिएको थियो । बिहान ७ बजेदेखि चारै स्थानमा बाटो खुलाएर यातायात आवागमन सुचारु गरिएको उहाँले बताउनुभयो ।
राजमार्ग सञ्चालनमा आएपछि अवरुद्ध भएका मालवाहक सवारीसाधन र यात्रुबाहक बसहरू क्रमशः गन्तव्यतर्फ अघि बढेका छन् । यद्यपि वर्षा अझै रोकिएको छैन र रोशी खोलाको सतह बढ्दो क्रममा रहेकोले प्रहरी प्रशासनले सवारी चालक र यात्रुलाई सतर्क रहन आग्रह गरेको छ । विशेषगरी खहरे खोलाबाट बग्ने लेदो, पन्छाउने कार्य पूरा भए पनि निरन्तर वर्षाले फेरि अवरोध सिर्जना गर्ने सम्भावना भएकाले यात्रुहरूलाई अत्यावश्यकबाहेक लामो दूरीको यात्रा नगर्न सुझाव दिइएको छ ।
स्थानीयवासीका अनुसार अविरल वर्षापछि सडक माथिबाट खस्ने ढुंगा, माटो र लेदोले वर्षेनी समस्या ल्याउने गरेकाले यस क्षेत्रमा स्थायी समाधानका लागि पूर्वाधार सुधार आवश्यक छ । सडक पूर्ण रूपमा सञ्चालनमा आएको भए पनि जोखिम कायमै रहेकोले यात्रु र सवारी साधन चालकलाई विशेष सतर्कताका साथ आवागमन गर्नुपर्ने अवस्था छ ।
© 2026 All right reserved to sindhulisaugat.com
Design & Developed By
