सोमवार , भाद्र २, २०८२
सिन्धुली, २भदौ – सिन्धुलीको हरिहरपुरगढी गाउँपालिका–४ लाकुडाकी एक गर्भवती महिलालाई स्वास्थ्य संस्था लैजाँदै गर्दा बाटोमै सुत्केरी व्यथा लागेपछि स्थानीय स्वास्थ्यकर्मीको सक्रियतामा आमा र नवजात शिशु दुवैको जीवन सुरक्षित भएको छ । अस्पताल पुग्नै नपाई बच्चा जन्मेको खबर पाउनेबित्तिकै महेन्द्रझ्याडी स्वास्थ्य चौकीको टोली तत्काल घटनास्थलमा पुगेको थियो ।
घटनास्थल पुगेका स्वास्थ्यकर्मीको टोलीले आकस्मिक रूपमा सुत्केरी भएकी महिलालाई तत्काल आवश्यक स्वास्थ्य सेवा प्रदान गरेको थियो । उनीहरूले सावधानीपूर्वक सालनाल काटेर आमा र बच्चा दुवैलाई प्राथमिक उपचार प्रदान गरे । त्यसपछि उनीहरूलाई एम्बुलेन्समार्फत महेन्द्रझ्याडी स्वास्थ्य चौकीमा ल्याइएको थियो ।
महेन्द्रझ्याडी स्वास्थ्य चौकीका एक स्वास्थ्यकर्मीका अनुसार, “हामीलाई खबर पाउनेबित्तिकै हामी सबै तयारीका साथ घटनास्थलतर्फ लाग्यौं । बाटोमा सुत्केरी हुनु जोखिमपूर्ण अवस्था हो, तर हामीले समयमै पुगेर आमा र शिशु दुवैको जीवन बचाउन सफल भयौं ।“ उहाँले यस घटनाले गाउँघरमा पनि आकस्मिक स्वास्थ्य सेवाको आवश्यकता रहेको र यसको लागि तयारी अवस्थामा रहनुपर्ने कुरामा जोड दिनुभयो ।
स्वास्थ्य चौकीका अनुसार, हाल आमा र बच्चा दुवैको स्वास्थ्य अवस्था सामान्य र सुरक्षित छ । उनीहरूलाई थप स्वास्थ्य निगरानीका लागि केही समय स्वास्थ्य चौकीमै राखिएको छ । यस घटनाले ग्रामीण क्षेत्रमा गर्भवती महिलाहरूको लागि स्वास्थ्य सेवाको पहुँच बढाउनु पर्ने आवश्यकतालाई पनि उजागर गरेको छ ।
ग्रामीण भेगका कतिपय ठाउँमा यातायातको सुविधा नहुँदा वा समयमा अस्पताल पुग्न नसक्दा यस्ता जोखिमपूर्ण घटनाहरू हुने गरेका छन् । यस घटनाले स्वास्थ्यकर्मीको तत्परता र स्थानीय निकायको समन्वयले ठूलो दुर्घटना टरेको छ । यस कार्यको स्थानीय बासिन्दाले पनि प्रशंसा गरेका छन् ।
यो घटनाले गर्भवती महिलाहरूलाई सुत्केरी हुनुअघि नै नजिकको स्वास्थ्य चौकी वा अस्पतालमा नियमित जाँच गराउन र जोखिमबारे सचेत रहन प्रेरित गरेको छ । साथै, स्थानीय सरकारले पनि ग्रामीण क्षेत्रमा एम्बुलेन्स सेवा र आकस्मिक स्वास्थ्य टोलीको व्यवस्थापनमा थप ध्यान दिनुपर्ने आवश्यकता देखिएको छ ।
© 2026 All right reserved to sindhulisaugat.com
Design & Developed By
