• मङ्लबार, अशोज ७, २०७६
  • Tuesday 24th September 2019

प्रदेशको नामाकरण र राजधानी परिर्वन गर्ने म्याद सकियो

प्रकाशित मिति : बुधबार, भदौ २५, २०७६

सिन्धुली साैगात संवाददाता

प्रदेश २ प्रदेश सभामा दर्ता भएको प्रदेशको राजधानी सम्बन्धी प्रस्तावमा नेपाल कम्युनिष्ट पार्टीका २ जना सांसदले संशोधन प्रस्ताव दर्ता गराएका छन ।

प्रदेशको राजधानीमा संशोधन दर्ता गरिएको भएपनि प्रदेशको नामाकरणको सन्दर्भमा कुनै पनि सांसदले संशोधन दर्ता नगराएको प्रदेशसभा सचिवालयले जनाएको छ । राजधानीको संशोधन हाल्ने म्याद २४ गते र नामको संशोधन हाल्ने म्याद २५ गतेसम्म थियो ।

५ भदौमा विभिन्न राजनीतिक दल तथा प्रदेश सांसदले प्रदेशको नाम र राजधानीबारे छुट्टाछुट्टै प्रस्ताव दर्ता गराएकोमा प्रमुख प्रतिपक्षी दल नेकपाका २ जना सांसदले संशोधन प्रस्ताव दर्ता गराएका छन ।

गत २२ भदौमा नेकपाका सांसद रामचन्द्र मण्डलले प्रदेश राजधानी जनकपुरधाम मात्र हुने गरी संशोधन दर्ता गराएका छन् । अर्का सांसद किशोरी साह कमलले २४ भदौमा राजधानी ‘जनकपुरधाम सोको क्षेत्र परिक्रमा मार्ग, ढल्केवरसहित सम्पूर्ण धनुषा जिल्ला’ हुने गरी लिखित संशोधन दर्ता गराएका छन् ।

गत ५ भदौमा विभिन्न राजनीतिक दल तथा अन्य प्रदेशसभा सदस्यले आ–आफ्नो प्रस्ताव दर्ता गराएका थिए । राजधानीको सवालमा ५ वटा प्रस्ताव दर्ता भएका छन् ।

नेपाली कांग्रेसले जनकपुरधाम उपमहानगरपालिका, नेकपा, सत्ता पक्षधर समाजवादी पार्टी र राजपा नेपालले मिथिला माध्यमिकी परिक्रमा मार्गसहित धनुषाको पूरै जिल्लाको सीमांकनसहित जनकपुरधाम नामाकरण प्रस्ताव गरेका छन् ।

बारा र पर्सा जिल्लाका नेपाली कांग्रेस र समाजवादी पार्टीका केही सांसदले वीरगञ्ज महानगरपालिका तथा वीरगञ्जदेखि बारा जिल्लाका कतिपय स्थानलाई प्रस्ताव गरेका छन् ।

नामाकरणको सन्दर्भमा दर्ता भएका ४ प्रस्तावमध्ये सत्ता पक्षधरले मधेश प्रदेश, नेकपाले जानकी र नेपाली कांग्रेसले मिथिला भोजपुरा प्रदेशको नाम प्रस्ताव गरेका छन् । पर्साका नेपाली कांग्रेसका केही सांसदले मध्य मधेश प्रस्ताव दर्ता गरेका छन् ।

सरकारको नेतृत्व गरिरहेका समाजवादी पार्टीका ३०, गठबन्धनका घटक राजपाका २५ गरेर ५५ मत सरकारसँग छ तर सत्तापक्षकै सांसदबाट समेत फरक–फरक प्रस्ताव दर्ता भएका छन् ।

प्रमुख प्रतिपक्षी नेकपासँग ३२, प्रतिपक्षी नेपाली कांग्रेससँग १९ र संघीय समाजवादी पार्टीसँग १ मत छन् । १ सय ७ सदस्य रहेको प्रदेश सभामा ती दुवै प्रस्ताव पारित हुन त्यसको दुईतिहाइ मत ७२ आवश्यक हुन्छ ।

राजधानीको सवालमा सत्तापक्ष र नेकपाको समान प्रस्ताव रहेकाले दुईतिहाइभन्दा पनि बढी ८७ मत पुग्ने देखिएको छ । राजधानी जनकपुरधाम हुने लगभग निश्चित छ ।

मतदानका लागि पार्टीको ह्वीप नलाग्ने हुनाले मतदान गर्न सांसदहरू स्वतन्त्र छन् । प्रदेशको नामबारे छुट्टाछुट्टै प्रस्ताव दर्ता गरिएकाले सहमति विना कुनै पनि नामको समर्थनमा दुईतिहाइ बहुमत पुग्ने देखिँदैन ।