एक दर्जन ठेकेदार कम्पनी कालोसूचीमा

सिन्धुली साैगात संवाददाता २०७५ फागुन २३ गते बिहीवार काठमाडौं

 

सरकारले सम्झौता अनुसार काम नगर्ने एक दर्जनभन्दा बढी ठेकेदारलाई कालोसूचीमा राखेको छ । सार्वजनिक खरिद अनुगमन कार्यालयले जनवरी यता मात्रै १३ वटा ठेकेदार कम्पनीलाई कालोसूचीमा राखेको हो ।

 

 

सम्झौता अनुसार काम नगर्ने र पटक-पटक म्याद थप गर्दा समेत काम सम्पन्न नगर्ने १३ वटा कम्पनीलाई निश्चित सयमसम्म सार्वजनिक कार्यमा सहभागी हुन नपाउने गरी कालोसूची राखिएको सार्वजनिक खरिद अनुमगन कार्यालयले जानकारी दिएको छ ।

 

कार्यालयका अनुसार कालोसूचीमा पर्नेहरूमा गोगंबुको जीएम कन्स्ट्रक्सन, गोरखाको मनकामना सप्लायर्स लगायतका ठेकेदार कम्पनी रहेका छन् ।

 

जीएम कन्स्ट्रक्सनलाई आगामी तीन वर्षसम्म सार्वजनिक कार्यमा सहभागी हुन नपाउने गरी कालोसूचीमा राखिएको सार्वजनिक खरिद अनुमगन कार्यालयले जानकारी दिएको छ । जीएम कन्स्ट्रक्सनलाई गत फेब्रुअरी २३ तारेखदेखि आगामी २२ फेब्रुअरी २०२२ सम्मका लागि कालोसूचीमा राखिएको छ ।

 

जीएम कन्स्ट्रक्सनले काभ्रे जिल्ला प्रशासन कार्यालयको भवन निर्माणका लागि ठेक्का लिएको र उक्त भवन समयमै निर्माण सम्पन्न नगरेका कारण कालोसूचीमा राखिएको हो ।

 

काभ्रे जिल्ला प्रशासन कार्यालयको भवन निर्माणका लागि जीएम कन्स्ट्रक्सनसँग २०६९ वैशाख १२ मा सम्झौता भएको थियो । १५ महिनामा सम्पन्न हुनुपर्ने उक्त भवन निर्माणको काम हालसम्म ३८ प्रतिशत मात्रै सम्पन्न भएको छ ।

 

जिल्ला प्रशासन कार्यालय काभ्रेले जीएम कन्स्ट्रक्सनले भवन निर्माणको काम समयमै सम्पन्न नगरेको र पटक-पटक म्याद थप गर्दा समेत काममा ढिलाई गरेका कारण कालोसूचीमा राख्न भन्दै सार्वजनिक खरिद अनुमगन कार्यालयमा निवेदन दिएको थियो । सोही निवेदनको आधारमा सार्वजनिक खरिद ऐन २०६३को दफा १ अनुसार कालोसूचीमा राखिएको सार्वजनिक खरिद अनुमगन कार्यालयले जनाएको छ ।

 

सो भवन निर्माणका लागि ४ करोड २२ लाख ५ हजार रुपैयाँमा जीएम कन्स्ट्रक्सनसँग सम्झौता गरिएको थियो ।

 

सम्झौता अनुसार भवन निर्माणको काम २०७० साउन १२ मा सम्पन्न हुनुपर्ने थियो । समयमै सम्पन्न नहुँदा तीन र त्यसपछि तीनपटक म्याद थप गरिएको र हालसम्म ३८ प्रतिशत मात्रै काम सम्पन्न भएको छ ।

 

त्यस्तै मनकामना सप्लायर्सलाई एक वर्षका लागि कालोसूचीमा राखिएको सार्वजनिक खरिद अनुमगन कार्यालयले जानकारी दिएको छ ।

 

भूकम्पपिडीत लाभग्राहीका घर पुनर्निर्माणका लागि सम्झौता अनुसार काठ ढुवानी नगर्दा मनकामना सप्लायर्सलाई सार्वजनिक खरिद ऐन अनुसार कालोसूचीमा राखिएको हो ।

 

यी हुन् कालोसूचीमा परेका अन्य कम्पनी

 

सार्वजनिक खरिद अनुगमन कार्यालयका अनुसार अन्य ठेकेदार कम्पनी समेत कालोसूचीमा परेका छन् ।

 

कार्यालयका अनुसार दी आनन्द प्रालि, टाटागाउँ प्रालि, एसबीए प्रगति जेभी, एसबीए छन् । यसैगरी प्रगति, शुभ नवारंग कन्स्ट्रक्सन, नेपाल प्रगति, महालक्ष्मी इन्जिनीयरिङ वर्कशप प्रालि, कैलाश निर्माण सेवा एण्ड सप्लायर्स प्रालि, सपना एण्ड सरोज कन्स्ट्रक्सन सप्लायर्स र कोस्टल पप्पु जेभी कालोसूचीमा परेका छन् ।

Nic Asia Bank-750X100-SinglePage Below Facebook Comment Ad
Top