हो कमरेड म वौलाएँ – बलराम तिमल्सिना

सिन्धुली साैगात संवाददाता २०७५ वैशाख १९ गते बुधवार साहित्य

 

हो कमरेड म वौलाएँ –

हो कमरेड म वौलाएँ !

म खसोखास वौलाएँ

खप्नै नसकेपछि तिम्रो तजविज

देख्नै नसकेपछि तिम्रो चर्तिकला

म सद्दे पटक्कै बन्न सकिन

सद्दे बन्नै नसकेपछि

हुन्छ के त कमरेड ?

कि सद्दे बन्छ

कि वौलाउँछ

तिमी सद्दे भयौ

म वौलाएँ

हो कमरेड म वौलाएँ !

 

तिमी हामीले सँगै देखेको सपना

जव हात्तीबाट मुसो भयो

र त्यो पनि चोपलियो पानीमा

तिमीले जव खुसियाली मनायौ त्यो क्षण

मेरो सपनाको छत्रभङ्ग हुँदा

कसरी सद्दे रहन सकिन्छ कमरेड

म खप्नै नसकेर बौलाएँ

तिम्रो तजविजको साम्राज्यमा

म खसोखास बौलाएँ !

 

जव सवैभन्दा भर परेको मानिस

आपत्तिजनक आवस्थामा भेटिन्छ

अरुलाई त ढाँट्न सकिंदो हो

आफैंलाई कसरी ढाँटिन्छ कमरेड ?

वर्षौं ढाँट्न खोज्दा पनि

जव सक्दै सकिएन ढाँट्न

सवैभन्दा पृय लागेको सपनालाई

सडकमै नाङ्गेझार पारेर

जव केही कमरेडहरूले सुरु गर्यौ

सामुहिक बलत्कारको अनुष्ठान

जव हामीले भन्नु पर्ने भयो-

“बल गर कमरेड हैंसे !”

ताल र लय मिलाएर हामीले

पिट्नु पर्ने भयो ताली निरन्तर

हुटिङ्ग गर्दै भन्नु पर्ने भयो-

“वाह कमरेड , क्या वात !”

यो नबेचिएको मनले

त्यसो गर्नै सकेन

अहँ सक्दै सकेन

त्यसपछि हो कमरेड

म सोह्रै आना बौलाएँ कमरेड !

 

एउटा भयानक दुर्घटनापछि

तिमी सद्दे बसेर मर्यौ

म बहुलाएँ तर वाँचे

यसैमा खुसी मान्दै

सगौरव घोषणा गर्छु

म बहुलाएँ कमरेड

म खसोखास बौलाएँ !

 

मलाई नवौलाएर मर्नुभन्दा

यसरी बौलाउँन गौरव छ कमरेड !

Nic Asia Bank-750X100-SinglePage Below Facebook Comment Ad
Top